ආදර කුක්කා....

කුක්කා කියපු ගමන් හිතන්න එපා පොශ් නොනලා ඔඩොක්කුවේ තියාන හුරතල් කරන පොලොස් ගැට වගේ සැපට ඉන්න හුරතල් බලු කුක්කෙක් ගැන කියන්න හදනවා කියලා. දැනටමත් එහෙම හිතලා බනින උන් ඉතිරි ටිකත් කියවලාම බැන්නට කමක් නෑ..

ඊයෙ හවස කෝච්චියෙ මුල්ලක් අල්ලගෙන සින්දුවකුත් අහ අහ පොඩි මනෝ පාරක් දාගෙන ඉන්නකොට මං ලඟින් වාඩි වෙලා හිටපු කොලුවා ටිකක් ලොකු ෆෝන් එකක් ඇදලා ගන්නවා දැක්කට පස්සෙ මට ඕක මොකක්ද කියලා බලන්නමයි හිත. මටත් ඉතින් ඔය ඉලෙක්ට්‍රොනික් ගැජට් එකක් දැක්කාම ඕක මොකක්ද කියලා බලනකම් නලියන ගතියක් ඒ කාලෙ ඉදන්ම තියෙන හින්දා හිමීහිට රබර් ඇහැ දාලා බැලුවා මොකක්ද මේ ෆෝන් එක කියලා. බැලින්නම් පොඩි බඩුවක් නෙවෙයි අයිෆෝන් සික්ස් ප්ලස් එකක්. ලේසි නෑ වැඩේ. දැන් බලනවා ඇති මොකක්ද මේ කුක්කගෙයි ෆෝන් එකෙයි තියෙන සම්බන්දෙ කියලා. 

ඔන්න දැන් තමයි ඔතෙන්ට කුක්කා එන්නේ..

මං අර ෆෝන් එක දිහා බලද්දි ඒකෙ තිරේ ප්‍රමාණයෙන් ලොකු නිසා මන් දැක්කා මේ කියන කොලුවා වයිබර් වලින් චැට් කරනවා. අනුන්ගෙ දේවල් බලන්න හොද නැති උනත් ඒ බලපු ටිකට මන් දැකපු එක වාක්‍යයක් නිසයි මේ පෝස්ට් එක ලියන්න හිතුනේ. අනේ ඉතින් ඒ දැකපු වාක්‍යයෙන් තමයි මන් දැන ගත්තෙ මූ චැට් කරන්නේ කෙල්ලත් එක්ක කියලා. අනේ ඒ සුන්දර වාක්‍ය තමයි "ඉක්මනට එනවද මගේ කුක්කෝ" කියලා එවලා තිබුණු එකක්.....

අනේ ඉතින් ඕක දැකපු ගමන් මට හිනා ගියා තමයි. දැන් ඉතින් උබලා ඕකට රටේ නැති කතන්දර කියයි. යකුනේ මන් හිනා උනේ ඒ කොලුවට නෙවෙයි. මේ කෙල්ලො කොල්ලො ලව් කරනකොට දෙන්නා දෙපැත්තට කියන නම් කන්දරාව මතක් වෙලා හිනා ගියේ. ආදරේ වැඩි කමට තමන්ගේ කොල්ලට එක නමකින් කතා කරලා මදි වෙලා නම් කීයක්නම් කියනවද මේ කෙල්ලෝ. වැඩි හරියක් කොල්ලො නම් ඉතින් වැඩිම උනොත් එකයි දෙකයි කියන්නෙ තමන්ගේ කෙල්ලට. ඕකෙන් ජනප්‍රියම එක තමයි "සුදු අම්මි". ඒකට කෙල්ලෝ... වැඩි හරියක් උන් කොල්ලට මැට්ටා කියන එකෙන් නම් බොහොම සුන්දරව කතා කරනවා පොඩ්ඩ ඇත්නම්.

ඔය මොන නම් ගොඩක් අහලා තිබුනත් "කුක්කෝ" කියනවා ඇහුවෙ පලවෙනි වතාවට. ඒ ෆෝන් එකෙන් ඒ මැසේජ් එක දැක්කාම හිතුනේ ඒ ගෑණු ළමයා කොයිතරම් ආදරෙන් ඒක ඒ කොලුවට කියනවා ඇද්ද කියලා ඒ මැසේජ් එක ආපු වෙලාවෙ ඒ කොලුවගේ මූණෙ තිබුණු හිනාව දැක්කාම.

අන්තිමට ඔහොම ගිහින් තව මොන මොන නම් වලින් කතා කරයිද දන්නෙ නෑ. අනේ මන්දා අර අලුතෙන්ම සම්මත වෙච්ච සභ්‍ය වචන කියලා ඔප්පු කරපුවාගෙනුත් කතා කලොත් තමයි නියමෙට තියෙන්නෙ...

ඕක කියාගෙන යද්දි මතක් උන ලව් කරද්දි වැඩිපුරම කියවෙන නම් ටිකත් කොටලම ඉවරයක් කරන්නම්කො..

"බබා, පැටියො, සුදූ, සුදු අම්මි, සුද්දි, චූටි, මැණික, රත්තරන්, මැට්ටා, බූරු පැටියා, සුදු මැණික, වස්තුව, අම්මි"

දැනට මතක් උනේ ඔච්චරයි..  තව තියෙනවා නම් පහලින් කොටන එකයි ඇත්තේ....

*ඡායාරුපය ගූග්ල් වෙතින්...