සර්පයා බෑග් එකේ....

මාමලා දෙන්නගෙ කතාව කිවුවට පස්සෙ දුෂ්ඨ මෙන්ඩා මාව නැති කරලා දැම්ම නිසා ආයෙ නම් ඔය වගේ කතා කියන්නෙ නෑ කියලා හිතාගෙන හිටියත් තියෙන පඩත්තල කමට එකක් කොටලා දාන්නම හිතුනා. දිගටම පරණ කතා කිය කිය හිටපු නිසා කැමරාව උස්සගෙන යනකොට අත්දැකපු දේවල් ටිකක් ලියන්නම් කියලා කොට කොට හිටියේ. ඒත් තියෙන කම්මැලිකමටද කොහෙද ඒක ඉවර කරගන්න බැරි උනා. (වැඩ නිසා බිසී උනා කියන එකත් කම්මැලිකමට කියන තව වචනයක් නිසා ඔන්න ඇත්තම කියලා දැම්මා.) ඒ නිසා අපෙ බාප්පා කියපු පොඩි කතාවක් කොටලා දානවා ඔන්න.

මේක අප්පච්චි ඒ කාලෙ කරපු වැඩක්. ඒ කාලෙ කියන්නෙ මීට අවුරුදු 40කට විතර කලින් අප්පච්චි ඉගෙන ගන්න කාලෙ කරපු නසරානි වැඩක් ගැන බාප්පා කිවුවේ. ඔය කියන දවස් වල අප්පච්චි ආයුර්වේද වෛද්‍ය විද්‍යාලෙ ඉගෙන ගන්න කාලෙ. ඒකෙ ඉන්න කාලෙත් එකට ඉන්න උන්ට පුළුවන් තරම් ලණු දීපු එක නම් ලස්සනට කරලා තියෙනවලු.

ඕකෙ ඉන්න උන් සති අන්තෙ නිවාඩුවට ගෙදර යනවනෙ. ඔන්න ඔහොම දවසක අප්පච්චිත් එක්ක එකම බැච් එකේ ඉන්න කෙල්ලො දෙන්නෙකුත් ගෙදර ගියාලු. උන් දෙන්නා යනකම් බලාගෙන ඉඳලා අප්පච්චියි තව එකෙකුයි පෙරලි පෙරලි හිනා වෙනවලු. වටේ උනටත් මේ මොකද කියලා හිතාගන්න බැරුව දෙන්නගෙන් අහනකොට කියනවලු "සඳුදට මොකද වෙන්නෙ කියලා බලපල්ලකො" කියලා ආයෙත් හිනා වෙනවලු.

ඔන්න සති අන්තෙ නිවාඩුවට ගෙවල් වලට ගියපු උන් සඳුදා එනවලු. දැන් කට්ටියම බලන් ඉඳලා අර කෙල්ලො දෙන්නා ආපහු එනකම් මොකද මුන් දෙන්නා එදා හිනා උනේ කියලා බලන්න.

එක පාරටම අරුන් දෙන්නා කඩාගෙන බිඳගෙන මුන් සෙට් එක ඉන්න තැනට ඇවිත් දන්න සුද්ද සිංහල වචන සේරම එකතු කරලා බනිනවලු මූණු දෙක රතු කරගෙන. වැඩි පුරම බනින්නෙ අප්පච්චිටලු "උඹ තමා සද්ද නැතුව ඉඳගෙන මේ වගේ වැඩ කරන්නෙ. අපි දෙන්නට වෙච්චි ලැජ්ජාවක්. ඒ වෙලාවෙ කෑ ගැහුවා නම් මොකද වෙන්නෙ" කිය කිය. කොහොම හරි බැනලා බැනලා උන් දෙන්නත් හිනා වෙනවලු බඩවල් අල්ලගෙන.

දැන් වටේ ඉන්න උන් තිබ්බට වැඩිය අවුල් වෙලා මේකෙ තේරුම මොකක්ද දන්නෙ නැති නිසා. කොහොම හරි කෙල්ලො දෙන්නාගෙ හිනාව අමාරුවෙන් නවත්තගෙන අහලා මොකද උනේ කියලා. උන් දෙන්නා කියනවලු,

"එදා අපි දෙන්නා ගෙදර යන්න ගියානෙ. ඉතින් දුවගෙන දුවගෙන ගිහින් බස් එකට නැගලා කොහොම හරි සීට් එකකත් වාඩි වෙලා කයියකුත් දාගෙන යනකොට කොන්දා ආවා සල්ලි ගන්න. සල්ලි තිබුනෙ හෑන්ඩ් බෑග් එකේ නිසා මං බෑග් එක අතට අරගෙන සිපර් එකත් ඇරලා අත දැම්මා බෑග් එක ඇතුලට. මේකිත් එක්ක කියව කියව බෑග් එක ඇතුලට අත දාලා පර්ස් එක හොයනකොට එක පාරටම සීතලට දිගට මොකක් හරි අතට අහු උනා. මේ මොකක්ද කියලා එක පාරටම බෑග් එක ඇතුල බලද්දි දැකපු දේට මට කෑ ගැස්සෙන්න ආවෙ බස් එක ඇතුලෙම. අමාරුවෙන් කෑ ගැහිල්ල නතර කරන් ඇස් දෙකත් ලොකු කරන් මේකි දිහා බලද්දි මේකිත් එක පාරට බෑග් එකට එබුනෙ නැද්ද. යන්තම් මේකිගෙ කට මිරිකලා අල්ලගත්තු නිසා බස් එකේ හිටපු උන් බය වෙන එකයි, පොලීසි යන එකයි නතර කර ගත්තා. නැත්නම් අද කට්ටියම පොලීසියෙ."

ඕක අහගෙන ඉන්න කට්ටියම මුන් දෙන්නගෙන් අහනවලු "මොකක්ද බං බෑග් එකේ තිබුණෙ? සර්පයෙක්වත් හිටියද?" කිය කිය.

අර කෙල්ල අප්පච්චි දිහාට අත දික් කරලා කියනවලු,

"මෙන්න මේකා තමයි එදා ප්‍රැක්ටිකල් එකට බොඩි එක කපලා බලපු වෙලාවෙ ඒ මිනීයෙ තිබුනු අහවල් එක කපාගෙන ඇවිත් මගෙ හෑන්ඩ් බෑග් එකට දාලා තියෙන්නෙ....."

***ඡායාරූපය ගූග්ල් වෙතින්. (පිඹුරු හමකින් හදපු බෑග් එකක්)