ඇට කටු කෑ භූතයා...

අපෙ ගමට එන ප්‍රධාන පාර අයිනෙ පහලට වෙන්න තමයි සොහොන් පිට්ටනිය තියෙන්නෙ. සොහොන් පිට්ටනිය අයිනෙන්ම ඉවුර උඩට වෙන්න තියෙන පාරෙ යන එන අයට මුළු සොහොන් පිට්ටනියම හොඳට පේනවා. මේ කියන කතාව මීට අවුරුදු ගානකට කලින් මම ඉපදෙන්නත් ඉස්සර සිද්ද වෙච්චි දෙයක්. ඒ කාලෙ සොහොන් පිට්ටනිය කිට්ටුව ගෙවල් එකක්වත් නැති මහ පාලු පැත්තක්. ඒ හරියෙ ඉඳන් දෙපැත්තටම මීටර් දෙතුන් සීයක් යනකම් ගෙවල් තිබිලා නෑ. දැන් නම් සොහොන් පිට්ටනියට අල්ලපු වැටෙත් ගෙවල් තිය්නවා.

දවසක් රෑ හත හමාරට විතර කඩමණ්ඩියෙ අපෙ බාප්පා එහෙම ඉන්නකොට දෙන්නෙක් වැට් වැටී දුවගෙන එනවලු. මුන් දෙන්නා කඩමණ්ඩියට ඇවිත් බිම වැටිලා ගැහි ගැහි ඉන්නවලු කතා කරගන්නවත් පණක් නැතුව. එතන හිටපු කට්ටිය මුන් දෙන්නට වතුර බොන්න දීලා ටිකක් වෙලා හති අරිනකම් ඉදලා හිමින් විස්තරේ ඇහුවලු. කොහොම හරි මුන් දෙන්නා මොකකට හරි බය වෙලා ආපු බව කට්ටියටම තේරිලා තියෙනවා මුන්ගෙ මූණු දකිනකොටම.

ඔන්න මුන්ගෙ බය ගතිය ටික ඇරිලා ගියාම වෙවුල වෙවුල කියනවලු,

"අපි දෙන්නා කනත්ත ලඟින් බයිසිකලේ පැදගෙන ආවෙ. ඒ වෙලාවෙ කනත්තෙ ඇවිලි ඇවිලි තිබුණු දර සෑය ලඟ යකෙක් වාඩි වෙලා ඉදගෙන සෑයෙ පිච්චෙන ඇට කටු කෑලි උඩ දම දම කනවා දැක්කා. ඒකට බය වෙච්චි පාර අපි දෙන්නා සයිකලෙත් පෙරලගෙන වැටිලා මේ බයටම දුවගෙන ආවෙ" කියලා.

මුන් දෙන්නා කියන්නෙ බොරුවකුත් නෙවෙයි කියලා කට්ටියටම තේරිලා දෙන්නා බය වෙලා හිටපු විදිහෙන්. ඒත් ඉතින් එහෙම දෙයක් වෙන්න විදිහකුත් නෑනෙ කියලා කට්ටියම කතා වෙලා. කොහොම හරි බාප්පායි අනික් සෙට් එකයි මේ ගැන ගිහිල්ලම බලමු කියලා එතන හිටපු උනුයි අර බය වෙච්චි උන් දෙන්නයි ඇදගෙන සොහොන් පිට්ටනියට ගිහින්.

එදාම හවස ගමේ තිබුණු මළගෙදරක අවසන් කටයුතු කරලා තියෙනවා. ඒ දර සෑය ලඟ තමයි අර යකා ඉන්නෙ, උගෙ ඇගේ ඇඳුමක්වත් නෑ. එ නම් යකෙක්ම තමයි කිය කිය අරුන් දෙන්නා මග දිගට කියව කියව යනවලු.

ඔන්න කට්ටියම සොහොන් පිට්ටනිය ලඟට ඇවිත් සද්ද නැතුවම පාර අයිනට ඇවිත් බලනකොට මෙන්න බොලේ ඇත්තටම තාමත් ඇවිලෙන සෑය ලඟ ඇඟේ නූල් පොටක්වත් නැති එකෙක් බිම ඉඳගෙන ඉන්නවලු. මූ සැරින් සැරේ ලී කෝට්ටක් අරගෙන සෑයෙ තියෙන අඟුරු අස්සෙන් සුදු පාටට පොඩි පොඩි කෑලි ඇදලා අරගෙන උඩ දම දම කනවලු.

දැන් නම් චන්ඩි වගේ බලන්න ගියපු උන්ගෙ කකුල් මැන්ඩලින් ගහන්න පටන් අරන් උගුර කට වේලීගෙන එන්න අරගෙන එකා දෙන්නා ටික ටික පස්සට වෙනවලු. ඔය අස්සෙ ගම පුරාම හොල්මන් නටපු අපිට වඩා යක්කු කොහෙද කියලා අපෙ බාප්පයි, පොරගෙ අනික් බජාර් එකයි ඕකට බය වෙන්නෙ නැතුව සොහොන් පිට්ටනියට බැහෙලා සෑය ලඟට ගිහින් බලලා මේ මොකාද ඉන්නෙ කියලා. ලඟට ගිහින් හයියෙන් අහුවලු "තෝ මොකාද බොල මෙතන කොරන්නෙ?" කියලා.

එක පාරටම අර ඉඳගෙන හිටපු එකා උඩ පැනලා නැගිටලා බාප්පලා ඉන්න පැත්තට හැරුනලු. අනේ බලනකොට මේ අල්ලපු ගමේ මනුස්සයෙක් ඉදලා තියෙන්නෙ. අපෙ ගමේ බේකරියෙ කුලියට වැඩ කරන මනුස්සයලු. මූ දැක්කට පස්සෙ තමයි ඔන්න කට්ටියගෙ ඇඟවල් වලට ලේ උනලා තියෙන්නෙ.

මේ මනුස්සයා බේකරියෙ වැඩ ඉවර වෙලා ආපහු බයිසිකලේ පැදගෙන යනකොට වැස්සට අහු වෙලා හොඳටම තෙමිලා. ඉතින් වැස්සෙන් බේරෙන්න සොහොන් පිට්ටනියෙ තියෙන ගෙට වෙලා ඉඳලා වැස්ස පෑවුවට පස්සෙ තෙමිච්ච ඇඳුම වේලෙන්න කියලා අර ඇවිලෙන සෑය ලඟ කණුවක එල්ලලා එතනම ඉඳගෙන සීතල අඩු වෙන්න ගිනි තැපලා. ඔහොම ඉන්න ගමන් සොහොන් පිට්ටනිය අයිනෙ තියෙන කොස් ගස් යට වැටිලා තිබුණු කොස් ඇට අහුලගෙන ඇවිත් අර සෑයෙ අඟුරු අස්සට දාලා පුච්චගෙන කකා ඉඳලා තියෙන්නෙ.

ඕක දැකලා තමයි අරුන් දෙන්නා හොයන්නෙ බලන්නෙ නැතුව සයිකලෙත් එතන දාලා මීටර් පන්සීයක් විතර ගමටම දුවගෙන ගියේ.

*** පාරෙ ඉඳන් ගත්තු ගමේ සොහොන් පිට්ටනියක ෆොටෝ එකක් උඩ තියෙන්නෙ...