උත්සාහයේ ප්‍රතිපල ලැබීම......

කලින් පෝස්ට් එකේදි අපි එකතු වෙලා කරපු උද්ඝෝෂණය ගැන හදිස්සියෙන් ලියපු නිසාත් ඒ ගැන වැඩි විස්තරයක් කියපු නැති නිසා මේ පෝස්ට් එකෙන් ඒ ගැන කියන්නම්කො….

කුරුණෑගල නුවර මහාමර්ග‍යේ කිලෝමීටර් 3.5ක් පමණ ඉදිරියට යනවිට හමුවන පිලීකඩ හන්දියෙන් ආරම්භ වී වල්පලකන්ද හා ඉඳුල්ගොඩකන්ද ගම්මාන දෙක හරහා කුරුණෑගල රඹුක්කන මහාමාර්ගයේ කටුපිටිය හන්දිය දක්වා කිලෝමීටර් 10ක පමණ දුරක් දිවෙන C ශ්‍රේණියට අයත් වයඹ පළාත් සභාව මගින් නඩත්තු වන දැනට බෙහෙවින්ම අබලන්ව ඇති මාර්ගය ප්‍රතිසංස්කරණය කර දෙන ලෙස ඉල්ලා බලධාරීන් දැනුවත් කිරීම තමයි මෙම උද්ඝෝෂණයේ අරමුණ.

මධ්‍යම කදුවැටියේ එක් කෙලවරක් වූ කුරුණෑගල දිස්ත්‍රික්කයේ උසම කඳුවැටිය වන හඳුරුක්කන්දේ එක් පසෙක පිහිටා තිබෙන ඉඳුල්ගොඩකන්ද ගම්මානයත් ඒ වටා ඇති අනෙකුත් ගම්මාන සියල්ලමත් ප්‍රධාන මාර්ගය ලෙස භාවිතා කරන්නේ මෙම මාර්ගයයි. දැනට අවුරුදු විස්සක කාලයක් තුල නිසි පරිදි නඩත්තු නොවීම නිසා දැඩි ලෙස අබලන්ව ඇති මාර්ගය දෙවෙනි ලෝක යුධ සමයේ බෝම්බ ප්‍රහාරයන්ට ලක් වූ මාර්ගයක් සිහිකැඳවයි. නිසි කානු පද්දතියකින් තොරව මාර්ගය හරහා නිතරම ජලය ගලා යාම නිසා මාර්ගය තැන තැන තාර ගැලවී කානු හෑරී ගොස් විශාල වලවල් පෑදී තිබීම හේතුවෙන් බස්, ලොරි වැනි ලොකු වාහනයකට හෝ ගමන් කිරීම අපහසු තත්වයකට පත්ව තිබීම නිසා මාර්ගයේ ගමන් ගන්නා ලොකු කුඩා වාහන ඉක්මනින් අබලන් වීම, හදිස්සි ගමනක් යාමට නොහැකි වීම, ගිලන් රථය මගින් හෝ ලෙඩෙකු ගෙන යාමේදි ප්‍රමාද වීම වැනි බොහොමයක් ගැටළු ගෙවීගිය වසර විස්සක කාලය තුල නිරන්තරයෙන් අත්දැකීම මෙම ගම්මාන වල වැසියන්ට සාමාන්‍ය දෙයක් බවට පත්ව ඇත.

මාතෘ සායනයක් සහිත ප්‍රාදේශීය රෝහලක්, ජාතික පාසලක්, අවට ගම්මාන දහයකට පමණ සේවය සපයන උප තැපැල් කාර්යාලයක්, ග්‍රාමීය බැංකු කිහිපයක්, දහම් පාසල සහිත ප්‍රධාන විහාරස්ථානයක්, තේ රබර් පොල් වැනි අපනයන බෝග වගාවන් තිබෙන ඉඳුල්ගොඩකන්ද ගම්මානය මගින් අවට ගම්මාන වල ගම්වැසියන් සේවා ලබාගැනීමේදී මෙම අබලන් මාර්ගය නිසා දැඩි දුෂ්කරතා වලට මුහුණ දීමත්, දිනපතා රැකියා වලට නගරයට යන පිරිස මාර්ග අපහසුතාවයෙන් දුක් විඳීමත් වසර විස්සක් පුරාවට මෙම ගම්වැසියන්ට උරුම වූ කරුමයක්ම විය.

මෙම ගෙවී ගිය වසර විස්ස පුරාවට දැනුම් දිය යුතු රාජ්‍ය ආයතන සියල්ලටමත්, දේශපාලන නියෝජිතයින්ටත්, ජනාධිපතිතුමාටත්, මාධ්‍ය ආයතන සියල්ලටත් මේ ගැන ලිඛිතව හා මුණ ගැසීමට ගොස් පැහැදිලි කලත් සෑම විටම ලැබුණේ හිස් පොරොන්දු පමණි. හදලා දෙන්නම් කියනවා මිසක් අඩුම වශයෙන් ගමන් කල හැකි මට්ටමට හෝ මාර්ගය නඩත්තු කිරීමක් වත් සිදු නොවීම නිසා දිනෙන් දින මාර්ගය අබලන් වීම ඉක්මන් විය. වසරකට වතාවක් පමණ වලවල් කිහිපයකට ගල් දමා තාර ටිකක් යොදා "පැච් දැමීම" සිදු කලත් නිරන්තරයෙන් ඇද හැලෙන වර්ෂාව නිසා සතියකින් දෙකකින් පමණ නැවත වලවල් පෑදීම සාමාන්‍ය දෙයක් විය.

තව දුරටත් මෙම පොරොන්දු විශ්වාස කර රැවටීමට නොහැකි වූ තැන කෙසේ හෝ මෙම මාර්ගයේ ඇති දුෂ්කරතා ගැන වගකිවයුත්තන්ගේ ඇස් ඇරීමට නම් ගම්වැසියන් පාරට බැසිය යුතුයි යන අරමුණෙන් මෙම උද්ඝෝෂණය සංවිධානය කිරීමට සියල්ලෝම එක් විය.

මෙම මාර්ගය භාවිතා කරන ඉඳුල්ගොඩකන්ද, වල්පලකන්ද ඉහල, වල්පලකන්ද පහල, හඳුරුක්කන්ද වත්ත, මොරතැන්න, මොරතැන්න වත්ත, ගෝණාගල, ගෝණාගල්දෙනිය, වේරවැල්ල, ඉඳුල්ගොඩ, කටුපිටිය, කොස්ගොල්ල, උඩුමුල්ල, මානෙල්ඔලුව, මුවන්කන්ද යන ගම්මාන වල විහාරස්ථාන මූලික කර ගනිමින් සියළුම ගම්මාන සමිති හරහා ගම්වැසියන් සියල්ල එක්ව පිහිටුවා ගත් "ග්‍රාමීය මාර්ග සංවර්ධනය කරගැනීම සඳහා වූ ජනතා එකමුතුව" නම් සමිතිය හරහා මෙම උද්ඝෝෂණය සංවිධානය විය.

පසුගිය බදාදා (15) දින කුරුණෑගල නුවර ප්‍රධාන මාර්ගය හරස් කර පැය තුන හමාරක් පුරා පැවති උද්ඝෝෂණය නිමාවට පත්වූයේ එතැනට පැමිණි වයඹ පළාත් මාර්ග සංවර්ධන අධිකාරියේ අධ්‍යක්ෂක ඩබ්ලිව්. එම්. සී. ප්‍රනාන්දු මහතා දුන් පොරොන්දුවත් සමගිනි.

පසුගිය සෙනසුරාදා (18) සිට මාර්ගයේ ප්‍රතිසංස්කරණ කටයුතු ආරම්භ වීමත් සමග අප විසින් ගත් උත්සාහය මල්පලගැන්වී ඇති බව පසක් වේ. දැනට තාවකාලිකව ගමන් කල හැකි මට්ටමින් ප්‍රතිසංස්කරණය කරන අතරම ඉදිරියේදී මාර්ගය පුළුල් කර කාපට් ඇතිරීම සඳහා මිනුම් කටයුතු දැනට ආරම්භ වී ඇත.

මෙම උත්සාහය සාර්ථක කරගැනීමට සහය දුන් සැමට ස්තුතිය පුද කරන අතරම එදින නුවර මාරගයේ ගමන් කිරීමට නොහැකිව අපහසුවට පත් වූ සියලු දෙනාටම ගම්වැසියන් වෙනුවෙන් සමාව ඉල්ලා සිටිමි.

ප.ලි.

වයඹ පළාත් මහ ඇමති දයාසිරි මහතාට හූ කීමට හේතුව සහ පොලිසිය විසින් එදින ගම්වැසියන් ප්‍රවාහනය කල බස් රථයක් අධිකරණයට ඉදිරිපත් කිරීමත්, සංවිධායක මණ්ඩලය අත්අඩංගුවට ගැනීමට සූදානම් වීම ගැනත් වෙනම පෝස්ට් එකකින්...